Շնորհավորանքի խոսքեր, ժպիտներ և բարձր տրամադրություն. ՀԱՅԲԻԶՆԵՍԲԱՆԿԸ Բանկային աշխատողի օրվա առթիվ Գլխամասային գրասենյակում կազմակերպել էր ուրախ հավաքույթ, որի ընթացքում ամփոփվեցին նաև «Մենք՝ մեր աչքերով» խորագիրը կրող ֆոտոմրցույթի արդյունքները: Մրցույթին մասնակցելու համար անհրաժեշտ էր ստեղծագործ մոտեցմամբ, հումորով և լավատեսությամբ ներկայացնել բանկային աշխատողի կերպարը կամ նրա միջավայրը մեկ լուսանկարում:Բանկի Վարչության նախագահ Արտավազդ Սարգսյանը, շնորհավորելով աշխատակիցներին, վստահեցրեց, որ մոտ ապագայում թիմային աշխատանքի շնորհիվ արձանագրվելու են կարևոր ձեռքբերումներ. «Այսպես համախմբված լինելով՝ մենք հասնելու ենք այն նպատակներին, որոնք դրված են մեր առջև: Լինելով բանկային համակարգի առաջատարներից մեկը՝ միասին կարող ենք իրականացնել նույնիսկ ամենահավակնոտ ծրագրերը»: Ֆոտոմրցույթի նախաձեռնությունը լայն արձագանք էր ստացել Բանկի Գլխամասային գրասենյակի և մասնաճյուղերի աշխատակիցների շրջանում և նրանք մեծ ոգևորությամբ ներկայացրել էին իրենց յուրահատուկ գաղափարները մեկ լուսանկարում: Իսկ մրցույթի ամփոփման արդյունքում լավագույն տասը լուսանկարների հեղինակները խրախուսվեցին դրամական պարգևներով և ստացան հավաստագրեր: Մասնակիցների նախաձեռնողականությունն ու պատրաստակամությունը փաստեցին, որ Բանկի պատերի ներսում ստեղծվել է յուրահատուկ, ստեղծագործական մի աշխարհ, ինչը հետաքրքիր գույներ է ավելացնում պատասխանատու և թիմային աշխատանքին: